ვარლამ ლიპარტელიანი – ველოდებით დავით ქევხიშვილის ვაჟკაცურ ნაბიჯს, თუ თანამდებობას დატოვებს, მეგობრულ ხელს გავუწოდებთ

72

ველოდებით დავით ქევხიშვილის ვაჟკაცურ ნაბიჯს, ჩვენ მას გავუწოდებთ მეგობრულ ხელს და მთელი ცხოვრება ვიქნებით მეგობრები, – ამის შესახებ საქართველოს ნაკრების კაპიტანმა ვარლამ ლიპარტელიანმა განაცხდა, რომელმაც სასტუმრო “ბილტმორში” მიმდინარე ძიუდოს ფედერაციის ყრილობა პროტესტის ნიშნად დატოვა.

როგორც ვარლამ ლიპარტელიანმა აღნიშნა, ვერ კითხვებს, რომელიც ძიუდოისტებს დავით ქევხიშვილის მიმართ ჰქონდათ, პასუხები არ გაეცა.

„არანაირი პოლიტიკა, სუფთა ხელებით, ჯანსაღი გულით გვინდა, იყოს ძიუდოში ნორმალური სიტუაცია არ იყოს ერთპიროვნული მმართველობა, არ იყოს ერთი საძმაკაცოს მმართველობა მეტს არაფერს მოვითხოვთ. მან თავი აარიდა კითხვებს. ყრილობაზე მოგვიწია ჭიდაობით შესვლა. რაზეც საუბრობს ქევხიშვილი, რომ ჩვენ ვინმე ძალისგან ვიმართებით, ჩვენ ჩამოსაწერები ვართ, ვერც ერთ კითხვაზე პასუხს ვერ გვცემდა. ველოდებით გონივრულ გადაწყვეტილებას, ველოდებით დავით ქევხიშვილის ვაჟკაცურ ნაბიჯს, ჩვენ მას გავუწოდებთ მეგობრულ ხელს და მთელი ცხოვრება ვიქნებით მეგობრები, თუ დატოვებს თანამდებობას”, – განაცხადა ვარლამ ლიპარტელიანმა.

ძიუდოს ფედერაციის ყრილობა დახურულ რეჟიმში მიმდინარეობს.

ამასთან, ყრილობის დაწყებამდე, ფედერაციის პრეზიდენტმა, დავით ქევხიშვილმა განაცხადა, რომ მზად არის, ძიუდოისტების ბრალდებებს ნებისმიერ ფორმატში გასცეს პასუხი.

ძიუდოისტებმა დავით ქევხიშვილის გადადგომა რამდენიმე დღის წინ მოითხოვეს და ამავე მოთხოვნით აქციაც გამართეს.

ევროპის ჩემპიონატზე დაფიქსირებული სავალალო შედეგის შემდეგ, 30 აპრილს საქართველოს ძიუდოისტთა ეროვნული გუნდის სამწვრთნელო შტაბი სრული შემადგენლობით გადადგა.

ამასთან, კულტურისა და სპორტის მინისტრმა მიხეილ გიორგაძემ დღეს განაცხადა, რომ ძიუდოს ფედერაციაში არსებულ ვითარებას სპეციალური კომისია შეისწავლის, რომელშიც კულტურის სამინისტროს, პარლამენტის სპორტის კომიტეტისა და ოლიმპიური კომიტეტის წევრები გაერთიანდებიან.

პასუხის დატოვება

Please enter your comment!
Please enter your name here