ძიუდოისტებმა პროტესტის ნიშნად ყრილობა დატოვეს

14

ძიუდოისტებმა, რომლებიც ძიუდოს ფედერაციის პრეზიდენტის დავით ქევხიშვილის გადადგომას ითხოვენ, სასტუმრო “ბილტმორში” მიმდინარე ყრილობა დატოვეს.

როგორც ყირლობიდან გამოსულმა საქართველოს ნაკრების კაპიტანმა ვარლამ ლიპარტელიანმა განაცხადა, ფედერაციის პრეზიდენტი ძიუდოისტების კითხვებს არ პასუხობდა.

“ყრილობა მიმდინარეობს ისე, როგორც მათ უნდათ. მწვავე კითხვები დავსვით, რაზეც პასუხები ვერ მივიღეთ. ყველას ვთხოვთ, რომ გონივრული გადაწყვეტილება მიიღონ. დავით ქევხიშვილს ვთხოვთ, ვაჟკაცური გადაწყვეტილება მიიღოს და ცხოვრების ბოლომდე მეგობრები დავრჩებით”, – განაცხადა ვარლამ ლიპარტელიანმა.

ყრილობა დახურულ რეჟიმში მიმდინარეობს.

ამასთან, ყრილობის დაწყებამდე, ფედერაციის პრეზიდენტმა, დავით ქევხიშვილმა განაცხადა, რომ მზად არის, ძიუდოისტების ბრალდებებს ნებისმიერ ფორმატში გასცეს პასუხი.

ძიუდოისტებმა დავით ქევხიშვილის გადადგომა რამდენიმე დღის წინ მოითხოვეს და ამავე მოთხოვნით აქციაც გამართეს.

ძიუდოს ფედერაციის პრეზიდენტმა, დავით ქევხიშვილმა განაცხადა, რომ თანამდებობის დატოვებას არ აპირებს.

ევროპის ჩემპიონატზე დაფიქსირებული სავალალო შედეგის შემდეგ, 30 აპრილს საქართველოს ძიუდოისტთა ეროვნული გუნდის სამწვრთნელო შტაბი სრული შემადგენლობით გადადგა.

ამასთან, კულტურისა და სპორტის მინისტრმა მიხეილ გიორგაძემ დღეს განაცხადა, რომ ძიუდოს ფედერაციაში არსებულ ვითარებას სპეციალური კომისია შეისწავლის, რომელშიც კულტურის სამინისტროს, პარლამენტის სპორტის კომიტეტისა და ოლიმპიური კომიტეტის წევრები გაერთიანდებიან.

პასუხის დატოვება

Please enter your comment!
Please enter your name here