ზუგდიდში ერთ-ერთ სამშენებლო ობიექტზე მუშებს პირადობის მოწმობები ჩამოართვეს
ზუგდიდში ერთ-ერთ სამშენებლო ობიექტზე მუშებს პირადობის მოწმობები ჩამოართვეს

A+ A-

15:01 17/05/2019

ზუგდიდში, ბარამიას ქუჩაზე დევნილებისთვის განკუთვნილი საცხოვრებელი კორპუსის მშენებლობაზე დასაქმებულ მუშებს ობიექტის ადმინისტრაციამ პასპორტები და პირადობის მოწმობები გამოართვა. ამის შესახებ ინფორმაცია „კურიერმა“ კონფიდენციალური წყაროსგან მიიღო.

ირკვევა, რომ სამშენებლო სამუშაოებზე დასაქმებულებს უთხრეს, რომ პასპორტები დაზღვევისთვის სჭირდებათ და მას მხოლოდ ორშაბათს დაუბრუნებენ. „კურიერის“ გადამღები ჯგუფი ადგილზე მივიდა. მუშები ადმინისტრაციამ ობიექტზე ჩაკეტა. მათ შესვენების უფლებაც კი არ მისცეს.

"კურიერთან" დევნილები ადასტურებენ, რომ მუშებს პირადობები მართლაც ჩამოართვეს. ისინი არ გამორიცხავენ, რომ მმართველი გუნდი მსგავს ინსტრუმენტს არჩევნების გასაყალბებლად იყენებს. მუშებისთვის პირადობის მოწმობების ჩამორთმევის მიზეზები ობიექტის მენეჯერმა განმარტა.

მისი თქმით, დასაქმებულებს დოკუმენტები დაზღვევის გაფორმების მიზნით გამოართვეს. ბარამიას ქუჩაზე სამი საცხოვრებელი კორპუსი 10 თვეა, შენდება, თუმცა მუშებს სამუშაო დაზღვევა ამ დრომდე არ აქვთ.