"ჯანმრთელები და ავადმყოფები"
"ჯანმრთელები და ავადმყოფები"

A+ A-

18:01 17/06/2019

სინამდვილეში, ყველასთვის ყველაფერი ცხადია და რეალურად არც არავის ეშინია ვინმესი... მით უმეტეს, იმ "სულ რაღაც თხუთმეტიოდე ავადმყოფის, რომელიც გადაგვარებას უპირებს საქართველოს"!

ჩვენ უბრალოდ გვძულს ერთმანეთი (და ზოგჯერ გვიფინანსებენ კიდეც ამ სიძულვილს) და ვტკბებით ერთმანეთის აუტანლობით...

თორემ განა იმ ვირეშმაკა კამეჩისტანმოშიშვლებულმა, ბანჯგვლიან-პერანგისამხანაგ-ჩაოფლილმა კაცებმა არ იციან, რომ სინამდვილეში არანაირი "საფრთხე" არ მოდის იმ ხალხისგან, ვინც უმცირესობათა რიგშია ან ამ უმცირესობებს იცავს ლანძღვისა და უკულტურობისგან?

შეიძლება რომელიღაცა ტვინნაღრძობი ფსიქოპათ-რობოტივით პირჯვრისმწერი კი ფიქრობდეს, რომ ყველას ძალით გააგევებს სატანა, მაგრამ რა ვქნა, არც ასეთების შეშლილობის მჯერა, რადგან ზოგადად ეჭვი არ მეპარება, რომ ესენი ყველანი უკულტურო და ყველაფრისგან აცდენილ-ჩამორჩენილ-დაბოღმილი ფარისევლები და პლუს სარგებლიანი თუ უსარგებლო იდიოტები არიან...

მაგრამ რაშიც ნამდვილები არიან და არ ცრუობენ, ეს მათი ბოროტებაა, რადგან როგორც იქცევიან და რასაც გაბღავიან - ამას ბოროტება ჰქვია! თუ სიკეთე და სიყვარულია, როცა ემუქრები, რომ გალახავ, მოკლავ, გადაჯეგავ და გაანადგურებ, რაც არ უნდა ტყუილად წამოისროდე ამ სიტყვებს და როცა მხოლოდ სიტყვებს არც სჯერდები ზოგჯერ?!

ჰოდა, ვის-ვის და, ცნობიერ თუ არაცნობიერ ბოროტებს კი, თქვენსავე ენაზე რომ ვთქვა, მართლა შთანთქავს, როცა იქნება, ცეცხლოვანი გეენა!

"ცეცხლოვანი გეენა" - ეს სიტყვები ხომ გაგიგიათ, მექანიკურად პირჯვრისმწერო და ცოცხალი ადამიანების ღმერთის სახელით მაგინებელ-გამანადგურებელო უწიგნურებო?! არის ასეთი ტექსტი, "ახალი აღთქმა", შეგიძლიათ დაგუგლოთ კიდეც, ეს მაინც სცადეთ, სხვა თუ არაფერი.

მაგრამ კიდევ უფრო მძვინვარე ცეცხლოვანი გეენა ელის ქრისტიანობის სახელით მოქადაგე და პოლიტ თუ ფინანსური კაპიტალის მომხვეჭ პაწუა ანტიქრისტეებს, ამ უბადრუკ ნეო-სერგო ორჯონიკიძეებს, კრემლის ჭ-კლასის ბიზნესმენებისგან გადმოსროლილი "30 ვერცხლით" გამდიდრებულ "ცაკალელ" თვითდამტკბარ-ნარცის პროვოკატორებს (ზოგ-ზოგიერთების მოსკოვურ ბიოგრაფიებში მართლაც რომ ფიგურირებს გვარი "ორჯონიკიძე")!

აი, როგორების სულს ელის ჭეშმარიტი განსაცდელი! აი, ვის ელის სამუდამო "კბილთა ღრჭენა"!

"კბილთა ღრჭენა" - იქნებ ეს სიტყვები მაინც გეცნოს მექანიკური თოჯინასავით პირჯვრისმწერო საბჭოთა მოქალაქევ, ყელს რომ გამოღადრავდი ვინმეს პარტბილეთის გამო და აბსოლუტური უმრავლესობის მსგავსად, კანონიერი ათეისტი რომ იყავი სულ რაღაც 30 წლის წინ?! ადრე ბოლშევიკური უმრავლესობის წაქეზებით ითხოვდი "მავნე ელემენტების" განადგურებას(კალამს რომ ვერ გაგდებინებდნენ ხელიდან "ანანიმკების" წერით ატანილს), ახლა კი ახლებური "მავნე ელემენტები" გამოგიძებნეს ძველმა უფროსებმა - ანაფორები რომ აცვიათ ზოგიერთებს და შიგნით კაგებეს და პუტინის ფულის ოცნებით რომ უცემთ გული?!

ვითომ ქრისტიანობის გესმოდეთ რამე, ან საქართველოს ისტორიაზე გქონდეთ იმაზე მეტი წარმოდგენა, ვიდრე კინოფილმ "გიორგი სააკაძეში" და "ბაში-აჩუკში" გინახავთ, მორალს რომ კითხულობთ მარქსიზმ-ლენინიზმის საგამოცდო რიხით!

ამდენ წარმოუდგენელ პრობლემაში "ამ თხუთმეტიოდეს აქცია" გექცათ ქვეყნის და სამყაროს დამაქცევარ არმაგედონად?!

გაიძახით "ავადმყოფები, ავადმყოფები" და იმას კი ვერ გრძნობთ, რომ თავად ხართ "ავად" ამ გამოგონილი, სხვების მიერ წაქეზებული თუ გულწრფელი სიძულვილის გამო?!

აბა, ერთი თქვენმა მარკიზ-რაინდმა ჰკითხოს თავის იდეოლოგიურ მოძღვარ, საქართველოს დამოუკიდებლობის მოძულე ამხანაგ დუგინს, თვლის თუ არა ეს კრემლის ქურუმ-ჩეკისტი "ავადმყოფად", ვთქვათ, პეტრე ჩაიკოვსკის და ბარემ თავისი ლაყე ლოგიკით შეებას მისტიკურ-გაზპრომულ ფილოსოფიურ ჭიდილში, იხრაკება თუ არა ამ ეტაპზე ჯოჯოხეთში "გედების ტბის" ავტორი თავისი "არატრადიციული სექსუალური ორიენტაციის" გამო?!

მე კი ვიცი, თავისი მუსიკითა და ზნეობით ამდენი სიკეთისა და სიყვარულის მომტანი ჩაიკოვსკი სადაც იქნება ახლა და აი, იმაზე კი ეჭვი არ მეპარება, ვის ელოდება თქვენი საყვარელი სატანა ხელების (თუ გნებავთ, ჩლიქების) ფშვნეტით ადამიანთმოძულე დუგინ-პუტინ-ძველ თუ ნეო-ორჯონიკიძეებიან-შანტრაპიანა... ამათ რა მოთვლის - ლეგიონია მათი სახელი (ესეც სახარების სიტყვებია, უწიგნურო უ-მრევლესობავ, მარტო იქ რომ ხარ მრევლი, სადაც უმრავლესობის ჯოგია და საითაც გაგრეკ-გამოგრეკავენ, რადგან თავად აზროვნების უნარი არა გაქვს)!

უნდა გდებულიყო სახლში "ავადმყოფი" ჩაიკოვსკი და ახლაც სახლში უნდა დაეყუდოს ყველა, ვისაც ჩვენი სასიქადულო პატრიოტი დუგინისტები აუკრძალავენ გარეთ გამოსვლას, და ამის მაგივრად კი ლაღად და ბღავილით ირბინონ ნალჩიკელ პუტანკებზე მეოცნებე წელს ზემოთ შიშველმა ცალტვინა კაცებმა (თურმე ღამის კლუბებშიც რომ არ უშვებენ ამ საწყლებს - ხომ მოაწყვეს რამდენიმე წლის წინ აქცია - ქართველებს არ გვაკარებენ უცხოლ ბოზებსო!)! ესენი თურმე "ჯანმრთელები" ყოფილან და სხვა დანარჩენი - "ავადმყოფები", კარგად რომ მიბეგვავენ ცოლ-შვილს (თუ ეღირსათ ოდესმე) და მართლა ყველანაირ პერვერსიაზე რომ არიან წამსვლელები (თუ უკვე არ წასულან).

ვიძახით, რამხელა კულტურის ხალხი ვართო და, აბა, როგორღა ვართ, სად ვართ? სად ჩანს აქ კულტურა?

დაუსრულებელი საქ-სსრ-სტანი ვართ და მგონი კიდევ დიდხანს ვერ ამოვალთ უკულტურობის, სიბრიყვის და ფარისევლობის მზარდი ჭაობიდან!

წყარო: რადიო თავისუფლება