"საქართველოს ბანკის" არაპროფილური აქტივების შესახებ ყველამ ვიცით და რატომ არ რეაგირებს სახელმწიფო? - დავით ჭიჭინაძე
"საქართველოს ბანკის" არაპროფილური აქტივების შესახებ ყველამ ვიცით და რატომ არ რეაგირებს სახელმწიფო? - დავით ჭიჭინაძე

A+ A-

14:03 07/09/2019

პარტია "ტრიბუნას" ლიდერი დავით ჭიჭინაძე საქართველოს მთავრობის ეკონომიკური გუნდისგან საბანკო სფეროში არსებული ვითარების და ამ ვითარებაზე სახელმწიფოს მხრიდან არაჯეროვანი რეაგირების გამო, პასუხს ითხოვს. "ყველამ ვიცით "საქართველოს ბანკის" არაპროფილური აქტივები

"ემ კვადრატი, რუსთავის "აზოტი", "ევექსი“ და უამრავი სხვა.  ანუ, კანონი ირღვევა და ჩნდება გონივრული ეჭვი, მაშინ რატომ არ რეაგირებს სახელმწიფო?! ყალბი დღგ-ეებით 300 მილიონი თუ ასე ნაწილ-ნაწილ იპარებოდა ამ ქვეყანაში და ხელისუფლება არ იმჩნევდა, ან ვერ მიხვდა, მაშინ სულ მცირე, სამსახურებრივი გულგრილობისთვისაა ნახევარი ფინანსთა სამინისტრო დასაჭერი.

ბანკები დღეს ადვილი ფულის შოვნით არიან დაკავებული და საერთოდ არც კი აინტერესებთ ბიზნესის, მითუმეტეს მცირე და საშუალო ბიზნესის დაფინანსება. სავალუტო კურსი კი, პირდაპირაა მიბმული სავალუტო სპეკულაციებთან. ამიტომ ვეკითხები ეკონომიკურ გუნდს: ბანკები ბლუმბერგზე აძლევენ თუ არა ერთმანეთს ინფორმაციას მომავალი კურსის ტენდენციებთან დაკავშირებით?

რადგან, თუ პარამეტრები არაა გაუარესებული, მაშინ რატომაა ლარის კურსი ასეთ მდგომარეობაში?! სულ ამას ვამბობ, რომ ყველაზე დიდი წვლილი ლარის გაუფასურებაში ის სპეკულაცია, რასაც ბანკები მიეჩვივენ და რასაც მხოლოდ მათი მოგების გაასმაგება მოაქვს და არა გარეშე ან ეკონომიკურ ფაქტორებს.

აი ამაზე უნდა ეზრუნა მთავრობას დღეს და არა სტატისტიკური მონაცემების წარმოდგენაზე. ამიტომ ჰგავს სტატისტიკის დეპარტამენტის განცხადებას მინისტრების, თუ მინისტრობის კანდიდატების ყველა გამოსვლა. ანუ, ეკონომიკას რეალურად სჭირდება გაზრდა და არა ციფრებში და მანიპულაციებში", - აცხადებს დავით ჭიჭანაძე.

"რაც შეეხება ანაკლიის პორტს - ჩვენ ერთი ეტაპი გავიარეთ და ავკრძალეთ არაპროფილური საქმიანობა. რის შემდეგაც უნდა გაგვეგრძლებინა ამ კანონის მიღება, სადაც იქნებობა იმ მმართველი რგოლის და დამფუძნებლების სია, რომლებსაც არ ექნებოდათ არაპროფილურ საქმიანობაში მონაწილეობის მიღების უფლება. ეს რომ ბოლომდე მიგვეყვანა, არც ასეთი საუბარი გვექნებოდა ანაკლიის პორტთან დაკავშირებით, არც მითიური "თიბისი კონსორციუმი" იქნებოდა შექმნილი და არც მთელი მსოფლიოს წინაშე მოგვეჭრებოდა თავი, რომ თურმე პოლიტიკური დაპირისპირების გამო ვერ ხორციელდება ეს პროექტი.

თუმცა აქვე აუცილებლად - "საქართველოს ბანკი" - მასთან მიმართებაში რატომ არ ხდება აქცენტირება მის არაპროფილურ საქმიანობაზე? არ იცით, რომ "ემ კვადრატი“, რუსთავის "აზოტი", "ევექსი“ რეალურად მისია, თუ აქაც დამფუძნებელი ჯგუფებით ვიტყუებთ თავს?! ანუ, ყველაფერი რაც დღეს ბანკებთან არის დაკავშირებული, კანონის გვერდის ავლაა. მოკლედ, ამ მოცემულობით, რომლითაც დღეს ბანკები ოპერირებენ, არასოდეს არ დაუჭერენ მხარს არანაირ ბიზნესს. მცირე და საშუალო ბიზნესს კი, სახელმწიფოს მხარდაჭერა, მხარში დგომა, ფინანსური ხელმისაწვდომობა სჭირდება და არა მარტო დეკლარირებისთვის ჩაწერა პროგრამაში", - აცხადებს "ტრიბუნას" ლიდერი.

დამოუკიდებელი დეპუტატი ფინანსთა მინისტრისგან 20 წლის წინანდელი, ჩამოწერილი 25 მილიონი დოლარის გასაიდუმლოებული გადახდის გამო, პასუხს ითხოვს. "ფინანსთა მინისტრობის კანდიდატს, ბატონ მაჭავარიანს კი მინდა ვკითხო, რატომ მოხდა ჩვენი ხელისუფლების პირობებში, 20 წლის წინანდელი, ჩამოწერილი 25 მილიონი დოლარის გადახდა და რატომ არის ეს გასაიდუმლოებული?! საუბარია ვალზე, რომელიც ყველა ხელისუფლებამ აღიარა, როგორც შევარდნაძის კორუფციული ხელისუფლების მიერ აღებული ვალდებულება გარკვეული კომპანიის მიმართ.

დღეს კი, ხელში მაქვს საქართველოს მთავრობის 2015, 2016 და 2017 წლის განკარგულებები, "რაიფაიზენ ბანკსა" და საქართველოს შორის გასაფორმებელი მორიგების ხელშეკრულების პროექტების შესახებ. ეს არის ხელშეკრულება, რომლის მიხედვითაც, ფინანსთა სამინისტრო ფულს უყოფს იუსტიციის სამინისტროს და დაახლოებით 65 მილიონი ლარი მიდის ქვეყნის ბიუჯეტიდან. ანუ, ვის სასარგებლოდ მოხდა ეს გარიგება? პრინციპში, ყალბი დეღეგეების პირობებში არც ეს არის გასაკვირი.

ეტყობა ისეთი ადამიანები იყვნენ ჩართულები ამ ამბებში, რომ ფინანსთა სამინისტრო ორი წლის განმავლობაში ვერ ჩაერია საქმეში. ასე რომ, ეკონომიკური გუნდის მიერ წარმოდგენილ პროგრამაში, მე ყველაფერს ვხედავ, სახელმწიფოს როლის გაძლიერების გარდა. სამაგიეროდ ვხედავ იმას, რომ ხალხი გააღატაკეს, ფული გააძვირეს და საკუთარი მატერიალური ინტერესების დასაკმაყოფილებლად მზად არიან, ეშმაკსაც კი შეეკრან", - აცხადებს დავით ჭიჭინაძე.