პედაგოგის ხელფასი 300 ლარით გაიზრდება - ბატიაშვილი
პედაგოგის ხელფასი 300 ლარით გაიზრდება - ბატიაშვილი

A+ A-

16:58 30/09/2019

„მიმდინარეობს განათლების კომპლექსური რეფორმა, რომელიც მოიცავს განათლების სფეროს ყველა მიმართულებას – სკოლამდელი განათლებით დაწყებული, მეცნიერებით დამთავრებული. შესაბამისად, ახალი ბიუჯეტით დაგეგმილია რეფორმის ეფექტურად განხორციელება. პირველ რიგში გამოვყოფდი სკოლის მიმართულებით სამ ძირითად ასპექტს:

პირველი, ეს არის სკოლის ინფრასტრუქტურა, სადაც ინფრასტრუქტურის სამინისტროსთან ერთად დაგეგმილია როგორც ახალი სკოლების მშენებლობა, ასევე არსებული სკოლების რეაბილიტაცია; სარეაბილიტაციო პროექტების მასშტაბი წელს კიდევ უფრო გაიზრდება და უფრო მეტ სკოლას მოვიცავთ“, - ამის შესახებ განათლების, მეცნიერების, სპორტისა და კულტურის მინისტრმა მიხეილ ბატიშვილმა მთავრობის ადმინისტრაციაში ჟურნალისტებთან განაცხადა.

“მეორე უმნიშვნელოვანესი საკითხი ეს არის სახელმძღვანელოები, რომლის ხარისხის გაუმჯობესება უკვე დავიწყეთ, ამ მიმართულებით მუშაობა გაგრძელდება და კიდევ უფრო მაღალი ხარისხის სახელმძღვანელოებს მივიღებთ, რითიც ისარგებლებენ ჩვენი მოსწავლეები – და მესამე, ერთ-ერთი უმნიშვნელოვანესი ეს არის მასწავლებლები.

მოგეხსენებათ, რეფორმის ფარგლებში, შემოდგომაზე მასწავლებელთა ანაზღაურება იზრდება 150 ლარით და როგორც დავპირდით ჩვენს პედაგოგებს, მთავრობის გადაწყვეტილებით, მომავალი წლის ბიუჯეტში ხელფასების კიდევ დამატებით 150 ლარით ზრდა გათვალისწინებულია. ეს ნიშნავს იმას, რომ დღევანდელთან შედარებით, პედაგოგის ხელფასი ჯამში 300 ლარით გაიზრდება. ეს არის უმნიშვნელოვანესი ზრდა და დაკავშირებულია პირდაპირ პედაგოგების კვალიფიკაციის ამაღლებასთან. ყოველწლიურად ეს პროცესი გაგრძელდება და გვეყოლება პედაგოგები, რომლებიც ნამდვილად ღირსეულ ანაზღაურებას მიიღებენ“,- განაცხადა მიხიელ ბატიაშვილმა.