40 არასამთავრობო ორგანიზაცია თადუმაძის დიპლომის ნამდვილობის დასადგენად გამოძიების დაწყებას ითხოვს
40 არასამთავრობო ორგანიზაცია თადუმაძის დიპლომის ნამდვილობის დასადგენად გამოძიების დაწყებას ითხოვს

A+ A-

12:49 18/10/2019

40 არასამთავრობო ორგანიზაცია შალვა თადუმაძის დიპლომის ნამდვილობის დასადგენად გამოძიების დაწყებას ითხოვს. კოალიციის, "დამოუკიდებელი და გამჭვირვალე მართლმსაჯულებისთვის" საეჭვოა მთავარი პროკურორის ის განცხადება, სადაც შალვა თადუმაძემ განმარტა, რომ დიპლომში ინსტიტუტში ჩაბარების წელი სწორად არ არის მითითებული, რადგან 1993 წელს მოცემული სასწავლებელი საერთოდ არ არსებობდა.

შესაბამისად, კიდევ უფრო საფუძვლიანი ხდება ეჭვი დოკუმენტში ყალბი მონაცემების შეტანასთან დაკავშირებით. კოალიცია ასევე მოუწოდებს პარლამენტს, კენჭი არ უყარონ შალვა თადუმაძის კანდიდატურას უზენაესი სასამართლოს მოსამართლედ დასანიშნად, ვიდრე დიპლომთან დაკავშირებით კითხვებს დამაჯერებელი პასუხები არ გაეცემა. არასამთავრობო ორგანიზაციების განცხადებას, უზენაესი სასამართლოს მოსამართლეობის კანდიდატი, მოქმედი გენერალური პროკურორი გამოეხმაურა.

"არასამთავრობო ორგანიზაციები წელიწადნახევარია ავრცელებენ ერთი და იგივე განცხადებას, არანაირი დოკუმენტი მათ არ გააჩნიათ, ჩემი დიპლომის არაკანონიერებასთან დაკავშირებით. ამ პოლიტიკურ ბოდვებზე მე კომენტარს არ ვაკეთებ,"- განაცხადა შალვა თადუმაძემ ჟურნალისტებთან.

თადუმაძის დიპლომთან დაკავშირებით არასამთავრობო ორგანიზაციების ჯგუფმა "კოალიცია დამოუკიდებელი და გამჭვირვალე მართლმსაჯულებისთვის“ განცხადება გუშინ გაავრცელა, რომელშიც ის თადუმაძის დიპლომის საკითხის გამოძიებას ითხოვს და პარლამენტს მოუწოდებს, რომ ვიდრე დიპლომთან დაკავშირებით კითხვებს დამაჯერებელი პასუხი არ გაეცემა. უზენაესი სასამართლოს მოსამართლედ დასანიშნად შალვა თადუმაძის კანდიდატურას კენჭი არ უყაროს.

"პარლამენტის იურიდიული კომიტეტის სხდომაზე გენერალურმა პროკურორმა განმარტა, რომ დიპლომში ინსტიტუტში ჩაბარების წელი სწორად არ არის მითითებული, რადგან 1993 წელს მოცემული სასწავლებელი საერთოდ არ არსებობდა.

შესაბამისად, ცხადია, რომ შალვა თადუმაძე სწავლას 1993 წელს ვერ დაიწყებდა, რაც კიდევ უფრო საფუძვლიანს ხდის ეჭვს დოკუმენტში ყალბი მონაცემების შეტანასთან დაკავშირებით. საქართველოს სისხლის სამართლის კოდექსის 362-ე მუხლის მიხედვით, დასჯადია არამარტო ყალბი ოფიციალური დოკუმენტის დამზადება ან/და შეძენა, არამედ მისი გამოყენებაც. ამიტომაც, აღნიშნული საკითხი სცდება ჩვეულებრივი პოლიტიკური დისკუსიისა და პროფესიული შესაბამისობის დასადგენად მიზანშეწონილობის ფარგლებს და მას სამართლებრივი განზომილება გააჩნია. საკომიტეტო მოსმენისას შალვა თადუმაძემ აღნიშნა, რომ "განათლების შესახებ" კანონში 1997 წელს შეტანილი ცვლილების შესაბამისად, ინსტიტუტი ექსტერნატის ფორმით 1998 წელს დაამთავრა, რაც სასწავლო დაწესებულებამ დიპლომში 1993 წელს სწავლის დაწყების ფორმით ასახა. მიუხედავად განმარტებისა, ბუნდოვანია, თუ სწავლის დაწყების თარიღად სასწავლებელმა დოკუმენტში რატომ მიუთითა ის წელი, როდესაც ის საერთოდ არ იყო რეგისტრირებული, ხოლო დიპლომში ექსტერნად დამთავრების შესახებ ჩანაწერი არ გააკეთა.

აღსანიშნავია, რომ შეკითხვები დიპლომის კანონთან შესაბამისობის თაობაზე ასევე გაუჩნდა პარლამენტის იურიდიულ საკითხთა კომიტეტსაც და მოითხოვა, რომ კენჭისყრამდე, გარკვეულმა კანდიდატებმა და მათ შორის, შალვა თადუმაძემ, წარადგინონ ინფორმაცია უმაღლესი იურიდიული განათლების დიპლომის თაობაზე, სადაც დადასტურებული იქნება, რომ დოკუმენტი კანონისმიერ მოთხოვნას შეესაბამება. კანონის თანახმად, უმაღლესი იურიდიული განათლება აუცილებელი წინაპირობაა არა მხოლოდ უზენაესი სასამართლოს მოსამართლეობისთვის, არამედ პროკურორის უფლებამოსილების განხორციელებისათვისაც, ხოლო შესაბამისი განათლების არქონა გენერალურ პროკურორს არაუფლებამოსილ პირად ხდის. აღნიშნული თავის მხრივ მნიშვნელოვან სამართლებრივ შედეგებს შეიძლება იწვევდეს გენერალური პროკურორის მიერ განხორციელებული მთელ რიგ ქმედებებთან დაკავშირებით. გარდა სამართლებრივი შედეგებისა მსგავს შემთხვევას შესაძლოა მძიმე უარყოფითი გავლენა ჰქონდეს სახელმწიფო ინსტიტუტების მიმართ საზოგადოების ნდობაზე. როდესაც ქვეყნის გენერალური პროკურორის თანამდებობა შეიძლება ეკავოს პირს, რომელიც ვერ აკმაყოფილებს კანონმდებლობის მოთხოვნებს და უფრო მეტიც, ეს თანამდებობა შესაძლოა ყალბი დოკუმენტის გამოყენების შედეგად ქონდეს დაკავებული, ამან შესაძლოა გამოუსწორებელი რეპუტაციული ზიანი მიაყენოს მთლიანად პროკურატურის ინსტიტუტს.

შესაბამისად მიგვაჩნია, რომ: აღნიშნულ ფაქტთან დაკავშირებით აუცილებელია ჩატარდეს სრულყოფილი გამოძიება, რათა დამაჯერებელი პასუხი გაეცეს ლეგიტიმურ შეკითხვას გენერალური პროკურორის დიპლომის ნამდვილობასა და შესაძლო ყალბი ოფიციალური დოკუმენტის გამოყენებასთან დაკავშირებით; პარლამენტმა კენჭი არ უნდა უყაროს შალვა თადუმაძის კანდიდატურას უზენაესი სასამართლოს მოსამართლედ დასანიშნად, ვიდრე ყველა ზემოთ აღნიშნული პროცედურა არ იქნება გავლილი და დიპლომთან დაკავშირებით კითხვებს დამაჯერებელი პასუხები არ გაეცემა; პარლამენტმა, კანონით გათვალისწინებული პროცედურებით უნდა უზრუნველყოს შალვა თადუმაძის დიპლომის ნამდვილობის გადამოწმება, ხოლო იმ შემთხვევაში, თუ პარლამენტი თადუმაძის ქმედებაში დანაშაულის ნიშნებს დაინახავს, კონსტიტუციის 48-ე მუხლის საფუძველზე, პარლამენტმა უნდა დაიწყოს იმპიჩმენტის პროცედურა.“- აღნიშნულია კოალიციის განცხადებაში.

"ჩვენ ვფიქრობთ, რომ გამოძიება უნდა დაიწყოს და ყველა კითხვას გასცეს პასუხი, თუ ეს კითხვები დამაკმაყოფილებელი იქნება, ძალიან კარგი პროცესისთვის, თუ არ იქნება, მაშინ გამოძიება უნდა მივიდეს ბოლომდე და მათ შორის არც იმპიჩმენტის პროცედურა არ გამოირიცხება," - განაცხადა "ახალგაზრდა იურისტთა ასოციაციის" დემოკრატიული ინსტიტუტების მხარდაჭერის პროგრამის დირექტორმა ვახუშტი მენაბდემ.

"სამართლიანი არჩევნებისა და დემოკრატიის საერთაშორისო საზოგადოების" აღმასრულებელი დირექტორის მიხეილ ბენიძემ განაცხადა, რომ იმ შემთხვევაში თუ თადუმაძის დიპლომი ყალბი აღმოჩნდება, შესაძლოა გენერალური პროკურორის იმპიჩმენტის საკითხიც დადგეს. "თუ დადასტურდა რომ დიპლომი არ არის ნამდვილი მაშინ თავად ამ პოზიციაზე, რომელსაც დღეს იკავებს ბატონი თადუმაძე, მიღებული გადაწყვეტილებები შეიძლება დადგეს კითხვის ნიშნის ქვეშ, შესაბამისად ეს შეიძლება იყოს მისი იმპიჩმენტის საფუძველი,"- განაცხადა მიხეილ ბენიძემ