საქართველოს ეროვნულ ბიბლიოთეკაში რუსული კულტურის და ენის ცენტრი არ გაიხსნება - გიორგი კეკელიძე
საქართველოს ეროვნულ ბიბლიოთეკაში რუსული კულტურის და ენის ცენტრი არ გაიხსნება - გიორგი კეკელიძე

A+ A-

14:31 29/11/2019

საქართველოს ეროვნულ ბიბლიოთეკაში რუსული კულტურის ცენტრი არ გაიხსნება, - აცხადებს ეროვნული ბიბლიოთეკის დირექტორი გიორგი კეკელიძე.

"ერთხელ ორი თვის და ერთხელაც ზაფხულის დასაწყისში, შემხვდა რუსეთიდან ჩამოსული კულტურული უწყების რამდენიმე წარმომადგენელი და შემომთავაზეს, ეროვნულ ბიბლიოთეკაში გაგვეხსნა რუსული ენისა და კულტურის ცენტრი, რადგან უკვე გვაქვს ასეთი ანგლო-ამერიკული, ფრანგული, გერმანული, იტალიური, ებრაული ცენტრები.

მე უარით გავისტუმრე. თუ ბატონო კარასინი ისევ ეროვნულ ბიბლიოთეკას გულისხმობს, რადგან მსოფლიო პრაქტიკა სწორედ ასეთ სივრცეში ითვალისწინებს კულტურული ცენტრები გახსნას, მაშინ მიიღოს საჯარო უარიც იმ ქვეყნის ბიბლიოთეკისგან, რომლის ნაწილიც გუშინ დაიპყრეს და დღეს საუკეთესო შვილებს გვტაცებენ. დავძენ, რომ ეთნოკულტურული ფაშიზმისგან ძალიან შორს ვართ.

ისეთივე წესების დაცვით ვინახავთ რუსულენოვანი წიგნების დიდ ფონდს, როგორც სხვა დანარჩენს. მე კი ახლა საფრანგეთში ვარ, სადაც სწორედ ამგვარი ქართული ცენტრის გახსნაზე ვმუშაობთ", - აცხადებს გიორგი კეკელიძე.

შეგახსენებთ, დეკემბერში თბილისში რუსული კულტურისა და ენის ცენტრი გაიხსნება. ამის შესახებ ზურაბ აბაშიძესთან შეხვედრის შემდეგ, გრიგორი კარასინმა განაცხადა.