"ანაკლიის განვითარების კონსორციუმთან" ხელშეკრულება აღარ განახლდება - ცქიტიშვილის უწყება გაცხადებას ავრცელებს
"ანაკლიის განვითარების კონსორციუმთან" ხელშეკრულება აღარ განახლდება - ცქიტიშვილის უწყება გაცხადებას ავრცელებს

A+ A-

13:14 14/01/2020

“ანაკლიის განვითარების კონსორციუმთან“ ხელშეკრულება შეწყვეტილია ყველა დადგენილი სამართლებრივი ნორმის დაცვით და მისი აღდგენა შეუძლებელია,“ - ამის შესახებ განცხადებას საქართველოს რეგიონული განვითარებისა და ინფრასტრუქტურის სამინისტრო ავრცელებს.

უწყების ინფორმაციით, საარბიტრაჟო დავასთან დაკავშირებით,  მხარეებს შორის  მოლაპარაკებები უნდა გიმართოს თუმცა ეს ნამდვილად არ შეეხება  საინვესტიციო ხელშეკრულების გაგრძელების საკითხს.

“საქართველოს მთავრობის 2020 წლის 9 იანვარის გადაწყვეტილება ხელშეკრულების შეწყვეტის შესახებ, წერილობითი შეტყობინებით, იმავე დღეს ჩაბარდა ანაკლიის განვითარების კონსორციუმს და ხელშეკრულება ოფიციალურად შეწყდა.

საინვესტიციო ხელშეკრულება ნამდვილად ითვალისწინებს 60-დღიან წინა საარბიტრაჟო ვადას, მაგრამ ეს ვადა უნდა გამოიყენოს იმ მხარემ, რომელიც გეგმავს საარბიტრაჟო დავის წამოწყებას და მხოლოდ წინა საარბიტრაჟო პროცედურებზე მოლაპარაკებას საარბიტრაჟო დავის თავიდან აცილების მიზნით.

მხარეთა შორის 60-დღიან პერიოდში გასამართი მოლაპარაკებები არ გულისხმობს მოლაპარაკებებს  საინვესტიციო ხელშეკრულების  რაიმე ფორმით აღდგენის და კონსორციუმის  მიერ ანაკლიის პორტის პროექტზე მუშაობის გაგრძელების შესაძლებლობას. ხელშეკრულება  შეწყვეტილია ყველა დადგენილი სამართლებრივი ნორმის დაცვით და მისი აღდგენა შეუძლებელია.

ამდენად, საქართველოს მთავრობასა და  „ანაკლიის განვითარების კონსორციუმს“  შორის არსებული სახელშეკრულებო ურთიერთობა შეწყვეტილია ყველანაირი სამართლებრივი საფუძვლისა და ნორმების დაცვით. შესაბამისად, ნებისმიერი განცხადება მთავრობასა და კონსორციუმს  შორის  ამავე ხელშეკრულების ფარგლებში ურთიერთობის გაგრძელების შესაძლებლობაზე,  არის მცდარი და ემსახურება მხოლოდ პოლიტიკურ სპეკულაციებს.

რაც შეეხება ანაკლიის პორტის პროექტის პერსპექტივას, საქართველოს მთავრობა კიდევ ერთხელ ადასტურებს ღრმაწყლოვანი ნავსადგურის მშენებლობის მნიშვნელობას და იწყებს პროექტის ხელახალი სატენდერო წინადადების მოსამზადებელ პროცედურებს,”-აღნიშნულია განცხადებაში.

შეგახსენებთ, ,,ანაკლიის განვითარების კონსორციუმს“ საქართველოს მთავრობამ საინვესტიციო ხელშეკრულება შეეუწყიტა , რაც იმას ნიშნავს, რომ ანაკლიის ღრმაწყლოვან პორტს  კონსორციუმი  არ ააშენებს.