კლეპტოკრატ ჩხარტიშვილთან, ხაზარაძესთან, ივანიშვილსა და სააკაშვილთან კოალიციას არ ვგეგმავთ - ფოფხაძე
კლეპტოკრატ  ჩხარტიშვილთან, ხაზარაძესთან,  ივანიშვილსა და სააკაშვილთან კოალიციას არ ვგეგმავთ - ფოფხაძე

A+ A-

15:02 21/09/2020

საქართველოს პარლამენტის  წევრი, პარტიის -  ჩვენი საქართველო - სოლიდარობის ალიანსი დიდუბე-ჩუღურების მაჟორიტარი დეპუტატობის კანდიდატი გედევან ფოფხაძე ამჟამად კოვიდინფექციას ვახტანგ ბოჭორიშვილის კლინიკაში ებრძვის.  ფოფხაძე გეგმავს, რომ გამოჯანმრთელების შემდეგ აქტიურ საარჩევნო კამპანიას გააჩაღებს და  დიდუბე-ჩუღურეთის ოლქის მანდატს  ქართული ოცნების“ კანდიდატს, გია ვოლსკის არ დაუთმობს.

სამედიცინო დაწესებულებაში მოხვედრილი დეპუტატი აცხადებს,  მას შესაძლებლობა მიეცა საპარლამენტო კონტროლი  სამედიცინო სისტემაზე  ყველაზე მაღალი ხარისხით განახორციელოს.  გედევან ფოფხაძე ხელისუფლებას პოლიტიკას უწუნებს და აცხადებს, რომ მთავრობამ ყურადღება პიარზე გადაიტანა და რეალურად, კოვიდინფექციის გასამკლავებლად მზაობა არ გააჩნია. ამ და სხვა საკითხებზე გედევან ფოფხაძემ „2020NEWS“-თან ისაუბრა.

-პირველ რიგში,  როგორია თქვენი ჯანმრთელობის მდგომარეობა?

-3 დღე მქონდა ტემპერატურა, მას შემდეგ არანაირი სიმპტომი, არც ხველება, არც თავის ტკივილი არ მქონია. ახლაც არაფერს ვუჩივი, ჩვეულებრივად ვარ.

-თქვენ შესაძლებლობა მოგეცათ, შიგნიდან გენახათ, რა პირობებში ხდება კოვიდინფიცირებული პაციენტების მკურნალობა და რა დასკვნა გააკეთეთ?

-2 დღე რესპუბლიკურ საავადმყოფოში ვიყავი, ახლა ვარ ბოჭორიშვილის კლინიკაში, აქ მართვის სულ სხვა სტანდარტია, შედარება არ არის იმ მდგომარეობასთან, რაც რესპუბლიკურ საავადმყოფოშია, სადაც არანაირი სტანდარტი დაცული არ არის.  მე განსაკუთრებული არაფერი მითქვამს, მაგრამ ის დეტალები, რაც ვისაუბრე,  იყო საყურადღებო და ის კი არ უნდა ეთქვა მინისტრ ტიკარაძეს, აბა,  ხუთვარსკვლავიან სასტუმროს ხომ არ შევთავაზებდითო, ამას არავინ ითხოვდა, საუბარი იყო  ავადმყოფი ადამიანების მიმართ  უფრო მაღალი სტანდარტის საჭიროებაზე.  

ცხელების ცენტრში კორონავირუსიანი და ჯანმრთელი ადამიანი ერთდროულად არ უნდა იყოს. როდესაც იქ  24 საათი მომიწია ყოფნამ,  საპირფარეშოში გასვლისას ხდებოდა გადაკვეთა სხვა მძიმე პაციენტებთან. როდესაც  სველი წერტილით სხვაც სარგებლობდა ჩემთან ერთად, ეს ვერ იქნება სწორი სტანდარტი, ვერც ჩემთან და ვერც  სხვა პაციენტთან მიმართებაში. ძალიან მარტივი ამბავია  ის, რომ  სველი წერტილები საერთოა, ეს არასწორია. 

როდესაც კოვიდმიმღებ დაწესებულებაში პაციენტს  ეუბნები, თუ ცუდად გახდები, გამოდი დერეფნის ბოლომდე და კარებზე დამიკაკუნე, არც ეს არ არის სწორი.

პრემიერმა განაცხადა,  რომ 3 000 საწოლი გვაქვს მზადო, ასე გლდანის იზოლატორშიც არის საწოლები, მაშინ იქ გავუშვათ, თუ მიგვაჩნია,  რომ კორონავირუსით ინფიცირებული პაციენტები მზრუნველობის ქვეშ კი არ უნდა გვყავდეს, არამედ მხოლოდ იზოლაციაში.

მე მიმაჩნია,  რომ ბოჭორიშვილის კლინიკაში  არის მზრუნველობა და რესპუბლიკურში - იზოლაცია. ეს არ არის სწორი.

რესპუბლიკურ საავადმყოფოში მე ვესაუბრე ექთნებს, მათი ხელფასი არის მიზერული და იმასაც ვერ იღებენ თვეობით, ესეც პრობლემაა.  საპარლამენტო კონტროლის ყველაზე მაღალი ხარისხი არის, როდესაც დეპუტატი უშუალოდ ამ სივრცეში ხვდები. ჩვენ როდესაც რამდენჯერმე დავიბარეთ მინისტრი ტიკარაძე პარლამენტში ამ თემებზე სასაუბროდ,  არ მოვიდა.  ახლა მე თვითონ,  როგორც პაციენტმა გამოვიარე ეს ყველაფერი. 

მე არ მიცდია, რომ სადაც მინდოდა,  იქ მოვხვედრილიყავი, ავიღე ტელეფონი და  დავრეკე 112-ში, ვითხოვე გადამიყვანეთ სამედიცინო დაწესებულებაში და მიმიყვანეს რესპუბლიკურში. მე მიმაჩნია, რომ რესპუბლიკურში არსებული პირობები იქ მყოფმა პაციენტებმაც უნდა გააპროტესტონ, რომ იღებდნენ მინიმალურ სტანდარტს და  საჭირო ყურადღებას.

-თქვენი აზრით,  რამდენად გამოიყენა სახელმწიფომ ზაფხულის  დრო ინფექციის წინააღმდეგ საბრძოლველად? 

-ვერ გამოიყენა. თუ ჩვენ ამ გადასახედიდან ვიმსჯელებთ, სახელმწიფო იყო ორიენტირებული უფრო პიარზე - ჩვენ რა მაგრები ვართ, პირველი ტალღა რა კარგად გადავიტანეთო. თავიდან არასწორად იყო შეფასებული ეს გამოწვევა. კორონა საშიში არ არის,  ეს არის საფრთხილო.

განსხვავება ის არის,  რომ სიფრთხილე არის ინტელექტუალური მდგომარეობა და შიში არის ემოციური მდგომარეობა. მთავრობამ აირჩია მოსახლეობის დაშინება. ჩაატარა პროპაგანდა შიშზე და არა - სიფრთხილეზე. კრიტიკული შეფასების სივრცე განდევნეს მედიიდანაც, პარლამენტიდანაც.

ამ არასწორმა პროპაგანდამ გამოიწვია ის,  რომ დღეს ბევრი ხარვეზით ხდება მეორე ტალღის შეხვედრა და ამის პასუხისმგებელი არის, პირველ რიგში, ჯანდაცვის სამინისტრო, პერსონალურად მინისტრი ეკატერინე ტიკარაძე და ის ადამიანები, რომლებმაც ჩათვალეს,  რომ ეს უნდა გამოიყენონ ამომრჩევლის  ხმების მისაღებად. თუ კარგად წავიდოდა ყველაფერი, ეს პოზიტიურად ისედაც იმოქმედებდა მმართველი ძალისათვის.

-ახლა, ამ გადასახედიდან როგორ აფასებთ, რამდენად  სწორი იყო  ქვეყნის ჩაკეტვის გადაწყვეტილება, რომელმაც ეკონომიკა დააზარალა?

-რა თქმა უნდა,  ჩაკეტვის მიმართაც უნდა გვქონდეს კრიტიკულობის უფრო მაღალი ხარისხი, მაგრამ იმ ეტაპზე ძნელი იყო პროგნოზირება და აქედან გამომდინარე, მაშინ რომ რაღაც სხვანაირად გაკეთებულიყო და კორონა გაქცეოდათ, სიკვდილიანობა გაგვეზრდებოდა, რადგან 100 ადამიანს ერთდროულიად ვერ მიიღებდნენ.

ეს პერიოდი კი უნდა ყოფილიყო სამედიცინო სფეროს გაძლიერებისათვის გამოყენებული, რაც არ მოხდა. ყოფილმა მინისტრმა, დავით  სერგეენკომ ეს სფერო იმდენად ჩააგდო, ქვეყანა რომ არ ჩაგვეკეტა, მძიმე შედეგები იქნებოდა. საჭირო იყო თავის დროზე ვირუსოლოგია  და ინფექციური დაწესებულებები  გაგვეძლიერებინა და  ეს ხალხი როდესაც დაგვჭირდა, მაშინ  კი არ გვექცია „გმირებად“...

სახელმწიფომ ვერ შეძლო, თანმიმდევრული ყოფილიყო, პირველმა შედეგმა მათ თვითკმაყოფილება მოგვარა და ახლა მთელი მსოფლიო ახერხებს სკოლების გახსნას, ამ დროს  ჩვენ ისე ჩაკეტვისკენ მივდივართ...

-რაც შეეხება თქვენ საარჩევნო კამპანიას,  როდის შეძლებთ გაგრძელებას?.

-ყოველდღიურად ველოდები უკვე პასუხს. ჩემს შტაბთან მაქვს ურთიერთობა დიდუბეში. მე მგონია,  თვის ბოლოს შემეძლება უკვე საარჩევნო კამპანიაში ჩართვა.

ენერგია ისეთი მაქვს, პირობას ვიძლევი, რომ დიდუბე-ჩუღურეთის საარჩევნო კამპანია იქნება უფრო რადიკალური და უფრო ენერგიული.  ძალიან შემართებით ვარ და  არ ვაპირებ გია ვოლსკის დავუთმო გამარჯვება.  დიდუბე-ჩუღურეთის მანდატი უნდა მივიღოთ მე და ჩემმა გუნდმა!

-თქვენი პარტია, კოვიდ-19-მა  ყველაზე მეტად დააზარალა...

-დავზარალდით,  მაგრამ ნათქვამია,  რაც არ გკლავს, უფრო გაძლიერებს.  ჩვენ აქედან ვინც გამოვალთ, გამოვალთ ასმაგი ენერგიით.

-თქვენ თვალყურს ადევნებთ მიმდინარე ამბებს და მიხეილ სააკაშვილის გუშინდელ განცხადებაზე რას იტყვით?

-მე მიმაჩნია, რომ მცდელობა „ქართულმა ოცნებამ“ და „ნაციონალურმა მოძრაობამ“ ორპოლუსიანად  აქციოს საარჩევნო კამპანია, იქნება შეუძლებელი.  ამომრჩევლის სრული უმრავლესობა იმ ჭკუაზეა, რომ არც „ნაცი“ უნდოდა და არც „ოცნება“, ყველა გამოკითხვა ადასტურებს ამას. მათი ეს მცდელობა ჩაიფუშება და ჩვენ შევძლებთ,  „ბატონობის მსურველ პარტიების“ დამარცხებას.

-როგორ წარმოგიდგენიათ,  თქვენი პარტია რამდენი მანდატის მიღებას შეძლებს არჩევნებში და ვისთან აპირებთ კოალიციას პარლამენტში.?

-ჩვენ მზად ვართ მთავრობის ფორმირებისათვის, რომ ავიღოთ პასუხისმგებლობა ქვეყნის მომავალზე. არანაირი კლეპტოკრატებთან კოალიციას არ გვეგმავთ,  თუ ხალხს ექნება მოთხოვნა სახალხო მთავრობაზე, მას შეუძლია, არჩევნებზე შემოხაზოს 19,  მისცეს ხმა „ჩვენს საქართველოს“  და დაამთავროს  კლეპტოკრატების მმართველობა.

ხალხმა,  ვინც ქართველი ხალხის ხარჯზე იცხოვრა 30 წელი,  დადგეს კუთხეში, ეს ეხება ჩხარტიშვილსაც, ხაზარაძეს,  ივანიშვილსაც  და სააკაშვილს.

ირინა მაკარიძე