ბადრი ესებუას ვიდეოკადრები გადაღებულია 6 ოქტომბერს - შსს
ბადრი ესებუას ვიდეოკადრები გადაღებულია 6 ოქტომბერს - შსს

A+ A-

13:06 29/10/2020

საქართველოს შინაგან საქმეთა სამინისტრო მედიასაშუალებებში გავრცელებულ, ბადრი ესებუას გადაადგილების ამსახველ ფოტო და ვიდეომასალასთან დაკავშირებით განცხადებას ავრცელებს.

უწყების ცნობით, 21 ოქტომბერს, ზუგდიდში, „საქართველოს ბანკის“ ფილიალზე მომხდარ თავდასხმაში პოლიციის მიერ იდენტიფიცირებული პირის – ბადრი ესებუას გადაადგილების შესახებ რამდენიმე ტელევიზიის მიერ საზოგადოებისთვის მიზანმიმართულად მიწოდებულ იქნა არასწორი ინფორმაცია.

„ფოტო და ვიდეომასალა სხვადასხვა ობიექტზე განთავსებული ვიდეომონიტორინგის მოწყობილობების მიერ გადაღებულია მიმდინარე წლის 6 ოქტომბერს და არა 27 ოქტომბერს, ასევე, გასაჯაროებული მასალა გადაღებულია სამეგრელოს რეგიონის სხვა მუნიციპალიტეტში და არა ზუგდიდში, როგორც ეს მედიასაშუალებებმა გაავრცელეს.

თავდასხმაში იდენტიფიცირებული პირის – ბადრი ესებუას ზუგდიდის ქუჩებში თითქოს თავისუფლად გადაადგილება და ამ ინფორმაციის მიზანმიმართული გაყალბება ემსახურება საზოგადოების სიცრუეში შეყვანას და სამართალდამცველი უწყებების დისკრედიტაციას. პოლიცია, 1988 წელს დაბადებული ბადრი ესებუას ადგილსამყოფელის დადგენისა და დაკავების მიზნით, სპეციალურ ოპერატიულ, საგამოძიებო და სამძებრო მოქმედებებს აქტიურ რეჟიმში განაგრძობს“, – ნათქვამია შსს-ს განცხადებაში.

შეგახენებთ, სენაკის მე-2 ბრიგადის ყოფილმა სამხედრო მოსამსახურემ, ბადრი ესებუამ 21 ოქტომბერს, ზუგდიდში, "საქართველოს ბანკში" 43 ადამიანი მძევლად აიყვანა და 500 000 დოლარის სანაცვლოდ გაათავისუფლა. უკვე მე-7 დღეა ესებუას ძებნა მიმდინარეობს. ამ ხნის განმავლობაში, ის სამართალდამცველებს 2-ჯერ დაუსხლტა ხელიდან.