თქვენ გაუხსენით ხელისუფლებას ხელ-ფეხი, თქვენ დაიჭირეთ ფანგანი, ივანიშვილის რეჟიმთან ერთად - მელია
თქვენ გაუხსენით ხელისუფლებას ხელ-ფეხი, თქვენ დაიჭირეთ ფანგანი, ივანიშვილის რეჟიმთან ერთად - მელია

A+ A-

10:09 25/01/2021
აჭარის უმაღლეს საბჭოში შესულ ირაკლი ჩავლეიშვილისთვის ნაგვის დამყრელ ირაკლი ფანგანის დაკავებაში დამნაშავეა ის ვინც, მას რისხვა დაატეხა და "ქართულ ოცნებას" მის დასაჭერად ხელ-ფეხი გაუხსნა. ამის შესახებ პარტია "ნაციონალური მოძრაობის" თავმჯდომარე ნიკა მელია აცხადებს.
 
მისი თქმით, ჩავლეიშვილს ფანგანმა ბევრისთვის მიუღებელი ფორმით პასუხი გასცა, რადგან უმაღლეს საბჭოში შესულმა ოპოზიციონერმა დეპუტატმა უღალატა საზოგადოებას, ოპოზიციას და შემდეგ პროვოკაციასაც კი მიჰყო ხელი. 
 
"ვინც დღეს ირაკლი ჩავლეიშვილისთვის ნაგვის დამყრელ ირაკლი ფანგანის დაპატიმრებას ამართლებთ, XVI საუკუნეში რომ გეცხოვრათ აუცილებლად მოითხოვდით იმ საჩინო ბარათაშვილის დასჯას, რომელმაც კლდიდან გადააგდო მოღალატე კახაბერ ყორღანაშვილი.
მაგრამ თქვენგან განსხვავებით, თანამედროვეებმაც და შთამომავლობამაც საჩინო ბარათაშვილი გმირად შერაცხა, მის მიერ კლდიდან გადაგდებული ყორღანაშვილი კი დღემდე ღალატის სიმბოლოა!
გადამეტებული რისხვა ჩემს თავზეც მაქვს გამოცდილი, როგორ ითხოვდა ბევრი 20 ივნისის შემდეგ ახალგაზრდების თვალების დამთხრელების ნაცვლად ჩემს დაჭერას.
 
ხშირად გვაღიზიანებს ფორმა და ვივიწყებთ არსს! საქმის არსი კი ისაა, რომ ბატონი ჩავლეიშვილი ჯერ გაერთიანებული ოპოზიციის სიაში ბრძანდებოდა, შემდეგ ბოიკოტს უჭერდა მხარს, უზენაეს საბჭოში არშესვლის მემორანდუმსაც მოაწერა ხელი, შემდეგ კი, გავარდა და ამ ყველაფრის მიუხედავად საბჭოში შევარდა და მოკალათდა.
 
დიახ, ბატონი ჩავლეიშვილი არავის გაახსენდებოდა, თავიდანვე რომ შესულიყო. ახლა კი, რა ქნა? იმ ხალხის მიერ დაორგანიზებულ აქციაზე მივიდა, რომელიც არჩევნების შემდეგ ქუჩაშია გამოსული საპროტესტოდ. მივიდა და სამწუხაროდ პროვოკაციულად აკრიტიკებდა იმ ნაცებს, ვისი წყალობითაც იმ საბჭოში შეძვრა", - ამბობს მელია.
 
"ნაციონალური მოძრაობის" თავმჯდომარე ამბობს, რომ მალე ქართველი ერი "ქართულ ოცნებას" ისტორიის სანაგვეზე მოისვრის და ყველაფერს თავისი სახელი დაერქმევა. 
 
"დიახ, ბატონებო, ჩავლეიშვილმა უღალატა საზოგადოებას, ოპოზიციას, შემდეგ კი თავისი თავის გასამართლებლად, პროვოკატორობასაც მიჰყო ხელი და ახალგაზრდა გამოიწვია.
 
ახალგაზრდამ ბევრისთვის მიუღებელი ფორმით გასცა პასუხი და თქვენც არ დაახანეთ, მთელი რისხვა არაკეთილსინდისიერ ჩავლეიშვილს კი არა, მას დაატეხეთ და ხელ-ფეხი გაუხსენით ხელისუფლებას მის დასაჭერად!
დიახ, თქვენ დაიჭირეთ ფანგანი ივანიშვილის რეჟიმთან ერთად.
 
ოცნების ხელისუფლებას ჰგონია რომ ეს ყველაფერი გაუვა. მაგრამ ერთი გვახსოვდეს, მალე ქართველი ერი ურნას არა, საერთოდ ისტორიის სანაგვეზე მოგისვრით და ვეღარავის დაიჭერთ!
ისტორია კი ყველაფერს თავის სახელს დაარქმევს- ჩავლეიშვილს მედროვედ, მანდატის ხამად მოიხსენიებს, დაჭერილ ფანგანს - გაბრაზებულ, აღშფოთებულ, გულანთებულ ახალგაზრდად, რომელსაც ზომიერებამ უღალატა პროტესტის ფორმის შერჩევისას", - წერს მელია სოციალურ ქსელში. 
 
ცნობისთვის, 25 იანვარს, ბათუმში გამართულ საპროტესტო აქციაზე, სადაც ბულვარში მრავალსართულიანი შენობის მშენებლობას აპროტესტებდნენ, ხმაური იყო. აქციის მონაწილეებმა, აჭარის უმაღლესი საბჭოს ერთადერთ ოპოზიციონერ დეპუტატ ირაკლი ჩავლეიშვილს ნაგვის ურნიდან ნარჩენები დააყარეს.
 
აღნიშნულთან დაკავშირებით, სამართალდამცველებმა არასამთავრობო ორგანიზაცია "ალტერნატივას" წევრი ირაკლი ფანგანი დააკავეს. მას 4 წლამდე პატიმრობა ემუქრება.