"ეს ნიშნავს, რომ ძალიან ვზიანდებით იმ მმართველობის სტილით, რომელიც არ არის კანონზე და სამართალზე ორიენტირებული"
"ეს ნიშნავს, რომ ძალიან ვზიანდებით იმ მმართველობის სტილით, რომელიც არ არის კანონზე და სამართალზე ორიენტირებული"

A+ A-

18:39 03/03/2021

"ლელოს" ერთ-ერთი ლიდერის ანა ნაცვლიშვილის თქმით, Freedom House-ის შეფასება ნიშნავს იმას, რომ ქვეყანაში მმართველობის სტილი არაა კანონზე და სამართალზე ორიენტირებული.

"ოლიგარქიული მმართველობა სახელისუფლებო წრეებში, კორუფციული გარიგებები და ამავე დროს, სასამართლოს დამოუკიდებლობის არარსებობა არის ის ფუნდამენტური პრობლემები, რომლებიც შემდგომ უკვე იწვევს ყველა სხვა დანარჩენ პრობლემას. ეს ნიშნავს იმას, რომ ჩვენ ძალიან ვზიანდებით იმ მმართველობის სტილით, რომელიც არ არის კანონზე და სამართალზე ორიენტირებული და სადაც, ზოგჯერ, კონკრეტული ადამიანების ახირებული ნება განსაზღვრავს, რა მოხდება და რა არ მოხდება", - განაცხადა ანა ნაცვლიშვილმა.

საერთაშორისო უფლებადამცველი ორგანიზაცია Freedom House-ის შეფასებით, პოლიტიკური უფლებების და სამოქალაქო თავისუფლების მხრივ საქართველოში მდგომარეობა გაუარესდა.

2020 წელს ქვეყანას 100 საუკეთესოდან 61 ქულა ჰქონდა, წლევანდელი შეფასება კი 60-ია. საქართველო ისევ ნაწილობრივ თავისუფალი ქვეყნების სიაშია. ანგარიშში წერია, რომ ოლიგარქიული გავლენა უარყოფითად მოქმედებს ქვეყნის პოლიტიკურ საქმეებზე, პოლიტიკურ გადაწყვეტილებებსა და მედია გარემოზე, ხოლო მართლმსაჯულება პოლიტიზირებულია.

ანგარიშში საუბარია არჩევნებზეც, Freedom House-ის მიხედვით, საქართველოში ტარდება კონკურენტული არჩევნები, რომლის დემოკრატიული ტრაექტორია უმჯობესდებოდა 2012-13 წლებში მთავრობის ცვლილებასთან ერთად, მაგრამ ბოლო წლებში გაუმჯობესების ტენდენციამ იკლო. ანგარიშში ნათქვამია, რომ მმართველმა პარტიამ მესამე ვადით გაიმარჯვა, თუმცა პროცესს ჩრდილი მიაყენა ხმების ყიდვამ, ძალადობის შემთხვევებმა და აშკარა შეცდომებმა მონაცემებში, რამაც ოპოზიციას ბოიკოტისკენ უბიძგა.

საქართველოს ერთ-ერთ მთავარ პრობლემად, ორგანიზაციის ანგარიშში ისევ სასამართლო და კორუფცია რჩება. Freedom House-ის რეიტინგში საქართველოს პოზიცია 2018 წლიდან ეტაპობრივად უარესდება, მაშინ ქვეყანას 64 ქულა ჰქონდა.