სახალხო დამცველი შსს-ში დაიბარეს
სახალხო დამცველი შსს-ში დაიბარეს

A+ A-

15:09 12/11/2018

საქართველოს სახალხო დამცველი ნინო ლომჯარია შს სამინისტროში გამოკითხვაზე დაიბარეს.

საქმე ეხება მის მიერ გავრცელებულ ინფორმაციას, რომლის თანახმადაც მის მიმართ მუქარა ხორციელდება.

ნინო ლომჯარია სალომე ზურაბიშვილის მიერ გაკეთებულ განცხადებას  მუქარასთან დაკავშრებით გამოეხმაურა. ის აცხადებს, რომ რამდენიმე თვის წინ სოციალურ ქსელში თავადაც ემუქრებოდნენ და ამ მუქარის წერილებს ასაჯაროვებს.

„ჩემი ისტორიაც მინდა დავწერო. ეს ყველაფერი მას შემდეგ დაიწყო, რაც სახალხო დამცველი გავხდი. აქამდე საჯაროდ ამ თემაზე არ მისაუბრია, თუმცა ვფიქრობ, რომ საკითხის მასშტაბურობიდან და სიმწვავიდან გამომდინარე, ყველამ უნდა ისაუბროს ამაზე. ერთხმად უნდა დავგმოთ მუქარა და ძალადობა, ვის წინააღმდეგაც არ უნდა იყოს ის და სამართალდამცავებს მოვუწოდოთ მთელი სერიოზულობით მოეკიდონ მსგავსი ფაქტების გამოძიებას.

რამდენიმე თვის წინ, პირადად გავხდი სწორედ ასეთი შეტევის ობიექტი. მემუქრებოდნენ შუბლის გახვრეტით, სნაიპერის ტყვიით, მიხსენიებდნენ უცენზურო სიტყვებით და ა.შ. უკვე ბევრისგან მსმენია იგივე, განსაკუთრებული სამიზნე სამოქალაქო აქტივისტები და პოლიტიკური პარტიების მხარდამჭერები, კანდიდატები არიან. სამწუხაროდ, უკვე ჩვეულებრივი პრაქტიკა გახდა მუქარა და შეურაცხყოფა, დაუსრულებელი შეტყობინენები, სადაც გაურკვეველი პირები სიცოცხლის მოსპობით იმუქრებიან.

ეს არის დანაშაული და მსგავსი შინაარსის შეტყობინებებზე რეაგირება არის სახელმწიფოს, სამართალდამცავი ორგანოების პასუხისმგებლობა და არა სამოქალაქო სექტორის, რომელიც თავად არის მსგავსი მუქარების სამიზნე.

ვგმობ, ყოველგვარ ძალადობას და ძალადობის მოწოდებას. მოვუწოდებს შსს-ს უკვე განხორციელებულ მუქარებსა და ფიზიკური ანგარიშსწორების ფაქტებზე მოახდინოს კანონის მთელი სიმკაცრით რეაგირება, რადგან ეს პრობლემა არ ეხება მხოლოდ ერთ ან ორ კანდიდატს. ეს ეხება ყველას და შეეხება თითოეულ ჩვენგანს, ვისი აზრიც ვიღაცისთვის ერთ დღეს მიუღებელი იქნება.

აქვე, ვასაჯაროებ რამდენიმე მუქარის შემცველ შეტყობინებას ჩემი მისამართით. სამწუხაროდ, ნაწილი წამეშალა ან ვერ შევინახე“, - განაცხადა სახალხო დამცველმა.

შეგახსენებთ, რომ დღეს საპრეზიდენტო კანდიდატმა სალომე ზურაბიშვილმა განაცხადა, რომ მას და მის შვილებს ყოფილი სამხედროები სიცოცხლის მოსპობით ემუქრებიან.