მიმდინარე წელს სტატისტიკურ კვლევებს 8 ახალი მიმართულება დაემატება
მიმდინარე წელს სტატისტიკურ კვლევებს 8 ახალი მიმართულება დაემატება

A+ A-

16:37 11/01/2019

საქართველოს სტატისტიკის ეროვნული სამსახური 2019 წელს ახალ სტატისტიკურ კვლევებს ჩაატარებს, ამ წლიდან არსებულ კვლევებს რვა ახალი მიმართულება დაემატება- ამის შესახებ დღეს შემაჯამებელ პრესკონფერენციაზე საქსტატის ხელმძღვანელმა გოგიტა თოდრაძემ განაცხადა.

თორდაძის თქმით, 2019 წელს დაიწყება: დროის გამოყენების გამოკვლევა, დაუკვირვებადი ეკონომიკის გამოკვლევა სასტუმროებისა და რესტორნების სფეროში, შუალედური მოხმარების გამოკვლევა, გამყვანი ტურიზმის გამოკვლევა, სამეცნიერო დაწესებულებებში მეცნიერული კვლევებისა და დამუშავების გამოკვლევა, ბაზრებსა და ბაზრობებზე მოვაჭრე ეკონომიკური სუბიექტების სტატისტიკური გამოკვლევა, ვალუტის გადამცვლელი პუნქტების გამოკვლევა და მომხმარებელთა კმაყოფილების დონის გამოკვლევა.

როგორც თოდრაძემ პრესკონფერენციაზე განაცხადა, 2018 წლის 11 თვის საშუალო ეკონომიკური ზრდის მაჩვენებელი 4,7%-ის ფარგლებშია.

მისი ინფორმაციით, აღნიშნული პერიოდის განმავლობაში საგარეო ვაჭრობის დარგში გაზრდილია როგორც ექსპორტის, ისე იმპორტის მაჩვენებლები, ექსპორტის მოცულობის 24%-იანი ზრდა რეკორდული მაჩვენებელია.

"აღნიშნული პერიოდის განმავლობაში დადებითი წვლილი ეკონომიკურ ზრდაში შეიტანა დამამუშავებელმა მრეწველობამ, უძრავი ქონებით ოპერაციების სექტორმა, ასევე ტრანსპორტის, სასტუმროების და ვაჭრობის დარგებმა. ეკონომიკურ ზრდაში უარყოფით წვლილის მქონე საქმიანობა ამ 11 თვის განმავლობაში მშენებლობის დარგში განვითარებული ტენდენციები იყო. რაც შეეხება საგარეო ვაჭრობას, ექსპორტის მოცულობა 24%-ით გაიზარდა და რეკორდულ მაჩვენებელს მიაღწია გასული წლის 11 თვის განმავლობაში. ასევე, 17%-ით არის გაზრდილი იმპორტის მაჩვენებელი", - განაცხადა გოგიტა თოდრაძემ.

ამასთან, საქსტატის ინფორმაციით, 2018 წლის 9 თვის განმავლობაში 27%-ით შემცირდა პირდაპირი უცხოური ინვესტიციები. გასული წლის უმსხვილეს პირდაპირი ინსვეტორი ქვეყნები კი აზერბაიჯანი, ნიდერლანდები და გაერთიანებული სამეფოა.

„ეს მაჩვენებელი განპირობებული იყო იმით, რომ მაგისტრალური გაზსადენის პროექტი დასასრულს უახლოვდება, ასევე რამდენიმე საწარმოს გადასვლა განხორციელდა საქართველოს რეზიდენტის საკუთრებაში, რაც უარყოფითად მოქმედებს პირდაპირი უცხოური ინვესტიციების მოცულობაზე“, - განაცხადა გოგიტა თოდრაძემ.

რაც შეეხება უმუშევრობის დონეს, გოგიტა თოდრაძის განცხადებით, აღნიშნული მაჩვენებელი გასულ წელთან შედარებით 1,1% -ით არის შემცირებული. 2018 წელს ქვეყანაში უმუშევრობის დონე 12,8%-ით განისაზღვრა.

ამასთან, 2018 წლის მესამე კვარტალში საშუალო თვიურმა ნომინალურმა ხელფასმა 1125.5 ლარი შეადგინა. საქსტატის ცნობით, მამაკაცების თვიური საშუალო ხელფასი 1360.5 ლარია, ხოლო ქალების - 851.9 ლარი.

აღსანიშნავია, რომ საქსტატის ინფორმაციით, წლიური ინფლაცის დონე 1,5%-ით განისაზღვრა, რაზეც გავლენა მოახდინა შემდეგმა პროდუქტებმა: პური, თამბაქოს ნაწარმი, ელექტროენერგიის გადასახადი, საწვავი.