ცხვარიჭამიაში 20 წლის ახალგაზრდის მკვლელობის საქმეზე დაკავებულ რვავე პირს პატიმრობა შეეფარდა
ცხვარიჭამიაში 20 წლის ახალგაზრდის მკვლელობის საქმეზე დაკავებულ რვავე პირს პატიმრობა შეეფარდა

A+ A-

15:56 31/07/2022

მცხეთის რაიონულმა სასამართლომ ცხვარიჭამიაში 20 წლის  მირიან კუკავას მკვლელობის საქმეზე დაკავებულ რვავე პირს აღკვეთის ღონისძიების სახით პატიმრობა შეუფარდა.

მოსამართლემ პროკურატურის შუამდგომლობა დააკმაყოფილა, რომელიც აღკვეთის სახით პატიმრობის გამოყენებას ითხოვდა.

სასამართლო პროცესზე მირიან კუკავას მკვლელობაში ბრალდებულმა დავით ჯიჯეიშვილმა განაცხადა, რომ ხულიგნობაში თავს დამნაშავედ არ ცნობს, მაგრამ აღიარებს, რომ ახალგაზრდა მისი მიყენებული ჭრილობებით გარდაიცვალა.

პროკურატურამ ცხვარიჭამიაში მომხდარი განზრახ მკვლელობის და ხულიგნობის ფაქტზე ერთ პირს, ხოლო გამოძიებისთვის ცრუ ინფორმაციის მიწოდების, დანაშაულის შეუტყობინებლობისა და ხულიგნობის ფაქტებზე შვიდ პირს ბრალდება გუშინ წარუდგინა.

გამოძიების ინფორმაციით, 28 ივლისს ცხვარიჭამიაში, დაბადების დღის წვეულებაზე სტუმრების ნაწილს შორის დაპირისპირება მოხდა. დაპირისპირებული მხარეები, მათ შორის განზრახ მკვლელობისთვის დაკავებული დავით ჯიჯეიშვილი დანის გამოყენებით, ერთმანეთს სიტყვიერ და ფიზიკურ შეურაცხყოფას აყენებდნენ, რა დროსაც გამოძიების ცნობით, ჯიჯეიშვილმა მირიან კუკავას დანით ჭრილობები მიაყენა. მიღებული დაზიანებების შედეგად მირიან კუკავა საავადმყოფოში მიყვანამდე გარდაიცვალა, ხოლო ბრალდებული შემთხვევის ადგილიდან მიიმალა. ის პოლიციამ ორი დღის წინ დააკავა.