ყირიმის ხიდი ნაწილობრივ დაინგრა ბოლო დაბომბვის შემდეგ, რომელიც 17 ნოემბრის ღამეს მოხდა. კერძოდ, წყალში ჩავარდა ხიდის თაღი და საავტომობილო სავალი ნაწილი. 

ხიდის თაღი წუხელ უკვე დაზიანებული იყო, თუმცა კონსტრუქციას ჯერ კიდევ ეჭირა. ასევე ცნობილია, რომ საავტომობილო ნაწილიც მოწყდა და წყალში ჩაინგრა, რაც ასევე ჩანს კადრებში.

ოკუპანტებმა ხიდი დაკეტეს. რუსეთის ტრანსპორტის სამინისტრომ განაცხადა, რომ ამ დროისთვის ყირიმის ხიდზე საავტომობილო და სარკინიგზო მიმოსვლა „შეუძლებელია“. რუსეთის მოქალაქეებს ურჩიეს, ხიდის მიმართულებით საერთოდ არ გაემგზავრონ.

როგორც ცნობილია, ყირიმის ხიდზე 17 ნოემბრის ღამეს მორიგი იერიში განხორციელდა. ქერჩის სრუტეზე გამავალი გადასასვლელის რაიონში ძლიერი აფეთქებების სერია გაისმა, რის შემდეგაც საოკუპაციო ხელისუფლებამ ტრანსპორტის მოძრაობის შეჩერების შესახებ გამოაცხადა.

ამ დაბომბვამდე ხიდზე იერიში 16 ნოემბრის ღამეს მიიტანეს. მაშინ საოკუპაციო ადმინისტრაციამ საავტომობილო მოძრაობა გადაკეტა, გადასასვლელთან მისასვლელ გზებზე კი მრავალკილომეტრიანი საცობები წარმოიქმნა.

კრემლის პრესმდივანმა დმიტრი პესკოვმა მოგვიანებით განაცხადა, რომ ხიდის დაზიანებები თითქოს უმნიშვნელო იყო. თუმცა, მოგვიანებით გამოქვეყნებული ფოტოები საგზაო საფარის დაზიანებასა და ნაგებობის ერთ-ერთი თაღის დეფორმაციაზე მიუთითებდა.

აღსანიშნავია, რომ ყირიმის ხიდი მიმდინარე წლის ივნისის დასაწყისშიც დაზიანდა. მაშინ რუსეთის ფედერაციაში გადაწყვიტეს თავი მოეჩვენებინათ, თითქოს თავდასხმა საერთოდ არ მომხდარა.