კულტურა
ეროვნული არქივის კინოთეატრში ელდარ შენგელაიას ფილმების რეტროსპექტივა გაიმართება

ფილმების ჩვენება „არაჩვეულებრივი გამოფენით“ (1968 წ.) 1 თებერვალს, 19:00 საათზე, გაიხსნება. რეტროსპექტივის ფარგლებში მაყურებელი ასევე იხილავს ფილმებს: „თეთრი ქარავანი“ (1963 წ.), „მიქელა“ (1965 წ.), ცისფერი მთები ანუ დაუჯერებელი ამბავი“ (1983 წ.), „სავარძელი“ (2017 წ.), „სამანიშვილის დედინაცვალი“ (1977 წ.), „შერეკილები“(1973 წ.) და „მრავალჟამიერი“ (ტრილოგია)(2022 წ.).რეტროსპექტივაზე დასწრება თავისუფალია.

1674640166

ეროვნული გალერეა მანანა თუმანიშვილის გამოფენას მასპინძლობს

ეროვნულ გალერეაში წარმოდგენილი ექსპოზიცია აერთიანებს მანანა თუმანიშვილის 70-მდე ნამუშევარს, რომლებიც ბოლო ათწლეულის განმავლობაში სხვადასხვა ტექნიკით არის შესრულებული.მანანა თუმანიშვილის მხატვრობას გამოარჩევს ფერის განსაკუთრებული გრძნობა და ემოციურობა. იგი მუდმივად ეძებს გამომსახველობით საშუალებებს და უკვე ნაცად მხატვრულ მასალას ახალ ხერხებს უკავშირებს.მანანა თუმანიშვილი თავის შემოქმედებაში აკვარელთან ერთად იყენებს შერეულ ტექნიკას. იგი ნამუშევრებში ცოცხალი სხეულის რბილსა თუ მკვრივ ფორმებს სხვადასხვა საღებავითა და ტექნიკით (აკრილი, პასტელი, გუაში, ტუში, მონოტიპია) აძლიერებს. ზოგჯერ აკვარელის გამჭვირვალობა პასტოზურობით არის შეცვლილი. ჩამუქებული სიღრმეებიდან გამოკრთის ფერადოვანი ლაქებით გამოსახული ფიგურები და საგანთა ფორმები.მანანა თუმანიშვილი 1966 წლიდან თბილისის სამხატვრო აკადემიაში პედაგოგიურ საქმიანობას ეწევა. ასწავლიდა ხელოვნების ისტორიას, დამწყებ მხატვრებს კი აკვარელის რთული ტექნიკით მუშაობის ცოდნასა და გამოცდილებას უზიარებდა. 1968 წლიდან იგი აქტიურად მონაწილეობს გამოფენებში საქართველოში და მის ფარგლებს გარეთ.აღსანიშნავია, რომ საქართველოს კულტურის სამინისტროს მიერ გამოცხადებული კონკურსის - „სახვითი და გამოყენებითი ხელოვნების დარგში საიუბილეო წიგნ-ალბომების გამოცემის ხელშეწყობა“ - ფარგლებში გამოიცა მანანა თუმანიშვილის ალბომი. კონკურსი 2022 წლის აპრილში გამოცხადდა. მისი მიზანია ქართული სახვითი და გამოყენებითი ხელოვნების კვლევისა და გამომცემელთა საქმიანობის ხელშეწყობა; ქართული სახვითი და გამოყენებითი ხელოვნებისა და ხელოვანთა შემოქმედების პოპულარიზაცია, კერძოდ, საიუბილეო თარიღთან დაკავშირებული (2021-2023 წწ.) და სახვითი და გამოყენებითი ხელოვნების განვითარების საეტაპო მნიშვნელობის მოვლენათა ამსახველი წიგნ-ალბომის მომზადება-გამოცემა. სამინისტროს მიერ კონკურსისათვის გამოიყო 150 000 ლარი.მანანა თუმანიშვილის გამოფენა ეროვნულ გალერეაში 2023 წლის 4 თებერვლამდე გაგრძელდება.

1674388865

კონსერვატორიის პრორექტორი მანანა დოიჯაშვილი გარდაიცვალა

მანანა დოიჯაშვილმა დაამთავრა თბილისის სახელმწიფო კონსერვატორია.1987-1988 წლებში იყო ყოველთვიური სატელევიზიო ციკლის – „მსოფლიოს სახელგანთქმული პიანისტების“ ავტორი; 1988 წელს დააარსა საკონცერტო ფირმა „კლასიკა“. 1995 წელს საფუძველი ჩაუყარა „საქართველოს მუსიკოს-შემსრულებელთა“ კონკურსს; 1996 წელს გახდა კონსერვატორიის დიდი დარბაზის სამხატვრო ხელმძღვანელი და გენერალური დირექტორი; 1997 წელს მისი თაოსნობით აღდგა თბილისის სახელმწიფო კონსერვატორიის დიდი დარბაზი; 1997 წელს დაარსა „პიანისტთა თბილისის საერთაშორისო კონკურსი“; ამავე წელს საფუძველი ჩაუყარა თბილისის სახელმწიფო კონსერვატორიის დიდი დარბაზის საერთაშორისო ფესტივალს „საახალწლო მუსიკალური შეხვედრები“.2000-2012 წლებში თბილისის ვანო სარაჯიშვილის სახელობის სახელმწიფო კონსერვატორიის რექტორი იყო. 2001-2007 წლებში მისი თაოსნობით მოხდა კონსერვატორიის შენობის რეკონსტრუქცია-რეორგანიზება, შექმნა კონსერვატორიის მატერიალურ-ტექნიკური ბაზა; 2002 წელს საფუძველი ჩაუყარა „ტრადიციული მრავალხმიანობის საერთაშორისო სიმპოზიუმს“  და „ტრადიციული მრავალხმიანობის საერთაშორისო კვლევის ცენტრს“.2005 წელს მისი თაოსნობით კონსერვატორია გახდა ევროპული კონსერვატორიების ასოციაციის წევრი.  2009-2010 წლებში იყო საქართველოში უწყვეტი სამუსიკო განათლების რეფორმის ინიციატორი; 2012 წლიდან იყო თბილისის სახელმწიფო კონსერვატორიის რექტორის მოადგილე.1999 წელს მანანა დოიჯაშვილი დაჯილდოვდა ღირსების ორდენით. 2005 წელს მიენიჭა საფრანგეთის რესპუბლიკის „ლიტერატურისა და ხელოვნების ორდენის რაინდის“ და „მშვიდობის ელჩის“ საპატიო წოდებები. 2004 წელს საშემსრულებლო ხელოვნებაში შეტანილი წვლილისათვის დაჯილდოვდა რუსეთის საშემსრულებლო ხელოვნების ფონდის პრემიით.  2003 წელს კი მანანა დოიჯაშვილმა მიიღო ქართველი მუსიკოსებისათვის უმაღლესი ჯილდო – ზ.ფალიაშვილის სახელობის პრემია.

1673946453