ცირკში სიარულის ასაკიდან დიდი ხანია, გამოვედი. არანაირი კომისია არ არსებობს საპარლამენტო, ისევე როგორც არ არსებობს პარლამენტი, - ამის შესახებ საქართველოს თავდაცვის ყოფილმა მინისტრმა ირაკლი ოქრუაშვილმა სასამართლო პროცესის დასრულების შემდეგ განაცხადა.

მისივე თქმით, არანაირი ვალდებულება კომისიაში მონაწილეობის არ ჰქონია.

"თავი მეგონა საბავშვო ბაღში - რა სიტყვებით მოვიხსენიე მიხეილ ქარელი სოციალურ ქსელში, მეკუთვნის თუ არა კონკრეტული გვერდი სოციალურ ქსელში, რა პოსტები მქონდა გამოქვეყნებული ბოლო პერიოდში კომისიასთან დაკავშირებით და ანალოგიური არასერიოზული კითხვები იყო.

არანაირი ვალდებულება ე.წ. კომისიაში მონაწილეობის არ მქონია იმიტომ, რომ არ ჩამბარებია შესაბამისი წესით კომისიის მიერ მიღებული გადაწყვეტილება ჩემს დაბარებაზე. წულუკიანის წერილი არ ნიშნავს გადაწყვეტილებას. კომისიამ გადაწყვეტილება მიიღო, ჩემი საქმე გადაიგზავნა პროკურატურაში ერთსულოვნად, კენჭის ყრით. ანალოგიურად უნდა დავებარებინე მეც.

რაც შეეხება არაიურიდიულ არგუმენტებს, ცირკში სიარულის ასაკიდან დიდი ხანია გამოვედი. არანაირი კომისია არ არსებობს საპარლამენტო, ისევე როგორც, არ არსებობს პარლამენტი. ეს არის ჩემო პოზიცია", - განაცხადა ირაკლი ოქრუაშვილმა.

საქართველოს თავდაცვის ყოფილი მინისტრი ირაკლი ოქრუაშვილი თბილისის საქალაქო სასამართლოში მაგისტრი მოსამართლის წინაშე დაიკითხა. საქმე პარლამენტის საგამოძიებო კომისიაზე არმისვლას უკავშირდება.